ਲੁਧਿਆਣਾ : ਖੰਨਾ ਸਾਈਬਰ ਪੁਲਿਸ ਸਟੇਸ਼ਨ ਨੇ ਲਗਭਗ 4.75 ਕਰੋੜ ਰੁਪਏ ਦੇ ਸਾਈਬਰ ਧੋਖਾਧੜੀ ਮਾਮਲੇ ਵਿੱਚ IDFC ਬੈਂਕ ਕਰਮਚਾਰੀ ਸਮੇਤ ਤਿੰਨ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਉਨ੍ਹਾਂ ਦੀ ਪਛਾਣ ਬੈਂਕ ਕਰਮਚਾਰੀ ਸਮਾਖ ਭੱਟ ਵਾਸੀ ਚੰਡੀਗੜ੍ਹ, ਬਲਦੇਵ ਸਿੰਘ ਵਾਸੀ ਚੰਡੀਗੜ੍ਹ ਅਤੇ ਗੁਰਜੰਟ ਸਿੰਘ ਵਾਸੀ ਪਿੰਡ ਸਲਾਣਾ (ਫਤਿਹਗੜ੍ਹ ਸਾਹਿਬ) ਵਜੋਂ ਹੋਈ ਹੈ। ਇਸ ਦੀ ਪੁਸ਼ਟੀ ਸਾਈਬਰ ਪੁਲਿਸ ਸਟੇਸ਼ਨ ਇੰਚਾਰਜ ਨਰਪਿੰਦਰ ਸਿੰਘ ਨੇ ਕੀਤੀ।
ਜਾਣਕਾਰੀ ਅਨੁਸਾਰ ਸੋਸ਼ਲ ਮੀਡੀਆ ‘ਤੇ ਫਾਰੇਕਸ ਵਪਾਰ (ਵਿਦੇਸ਼ੀ ਮੁਦਰਾ ਵਪਾਰ) ਦਾ ਲਾਲਚ ਦੇ ਕੇ ਇੱਕ ਲੜਕੀ ਨੇ ਮਾਛੀਵਾੜਾ ਸਾਹਿਬ ਦੇ ਇੱਕ ਕਿਸਾਨ ਨੂੰ ਇਸ ਤਰ੍ਹਾਂ ਫਸਾਇਆ ਕਿ ਉਸ ਨੇ 3 ਕਰੋੜ 72 ਲੱਖ 84 ਹਜ਼ਾਰ 999 ਰੁਪਏ ਗੁਆ ਦਿੱਤੇ। ਇਸ ਮਾਮਲੇ ’ਚ ਖੰਨਾ ਦੇ ਸਾਈਬਰ ਕ੍ਰਾਈਮ ਪੁਲਿਸ ਸਟੇਸ਼ਨ ਵਿੱਚ ਐਫਆਈਆਰ ਦਰਜ ਕੀਤੀ ਗਈ ਸੀ। ਪੁਲਿਸ ਅਣਪਛਾਤੇ ਲੋਕਾਂ ਦੀ ਭਾਲ ਵਿੱਚ ਤਕਨੀਕੀ ਤਰੀਕਿਆਂ ਨਾਲ ਜੁਟੀ ਹੋਈ ਸੀ। ਜਿਸ ’ਚ ਸਫਲਤਾ ਮਿਲੀ ਅਤੇ ਤਿੰਨ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਅਤੇ ਬਾਕੀ ਮੁਲਜ਼ਮ ਫਰਾਰ ਹਨ।
ਪੁਲਿਸ ਕੋਲ ਦਰਜ ਕਰਵਾਈ ਸ਼ਿਕਾਇਤ ਵਿੱਚ, 57 ਸਾਲਾ ਸੰਜੀਵ ਪਾਂਧੀ, ਵਾਸੀ ਮਕਾਨ ਨੰਬਰ 1996, ਕ੍ਰਿਸ਼ਨਾਪੁਰੀ ਮੁਹੱਲਾ, ਵਾਰਡ ਨੰਬਰ 4, ਮਾਛੀਵਾੜਾ ਸਾਹਿਬ ਨੇ ਕਿਹਾ ਕਿ ਇੱਕ ਅਣਪਛਾਤੀ ਲੜਕੀ ਨੇ ਉਸਨੂੰ ਟੈਲੀਗ੍ਰਾਮ ਐਪ ‘ਤੇ ਸੁਨੈਨਾਗੁਪਤਾ@199 ਆਈਡੀ ਤੋਂ ਸੁਨੇਹਾ ਭੇਜਿਆ। ਉਸਨੂੰ ਫਾਰੇਕਸ ਟ੍ਰੇਡਿੰਗ ਕਰਨ ਲਈ ਕਿਹਾ ਗਿਆ। ਉਸਨੂੰ ਤਿੰਨ ਗੁਣਾ ਮੁਨਾਫ਼ੇ ਦਾ ਲਾਲਚ ਦਿੱਤਾ ਗਿਆ। ਜਿਸ ਤੋਂ ਬਾਅਦ ਐਡਮਿਰਲ ਮਾਰਕੀਟਸ ਗਲੋਬਲ ਲਿਮਟਿਡ ਵਿੱਚ ਉਸਦਾ ਟ੍ਰੇਡਿੰਗ ਖਾਤਾ ਖੋਲ੍ਹਿਆ ਗਿਆ। ਇਸ ਖਾਤੇ ਰਾਹੀਂ ਲੈਣ-ਦੇਣ ਸ਼ੁਰੂ ਕੀਤਾ ਗਿਆ।
ਸ਼ਿਕਾਇਤਕਰਤਾ ਦੇ ਅਨੁਸਾਰ, ਫਾਰੇਕਸ ਟ੍ਰੇਡਿੰਗ ਦੇ ਨਾਮ ‘ਤੇ ਖੋਲ੍ਹੇ ਗਏ ਉਕਤ ਖਾਤੇ ’ਚ 18 ਦਸੰਬਰ 2024 ਤੱਕ ਵੱਖ-ਵੱਖ ਤਰੀਕਾਂ ‘ਤੇ ਉਸ ਤੋਂ ਕੁੱਲ 1 ਕਰੋੜ 4 ਲੱਖ 44 ਹਜ਼ਾਰ 999 ਰੁਪਏ ਟ੍ਰਾਂਸਫ਼ਰ ਕੀਤੇ ਗਏ। ਇਸ ਤੋਂ ਬਾਅਦ, ਉਸਨੂੰ ਕਾਰੋਬਾਰ ’ਚ ਮੁਨਾਫ਼ਾ ਦਿਖਾਇਆ ਗਿਆ। ਉਸਦੇ ਟ੍ਰੇਡਿੰਗ ਖਾਤੇ ਵਿੱਚ 3 ਕਰੋੜ 66 ਲੱਖ 16 ਲੱਖ 595 ਰੁਪਏ ਦਿਖਾਈ ਦੇਣ ਲੱਗੇ। ਉਸਨੂੰ ਲੱਗਾ ਕਿ ਕਾਰੋਬਾਰ ਸਹੀ ਢੰਗ ਨਾਲ ਹੋ ਰਿਹਾ ਹੈ ਅਤੇ ਉਸਨੂੰ ਮੁਨਾਫ਼ਾ ਭੇਜਿਆ ਜਾ ਰਿਹਾ ਹੈ। ਜਦੋਂ ਉਸਨੇ ਇਹ ਰਕਮ ਕਢਵਾਉਣ ਦੀ ਕੋਸ਼ਿਸ਼ ਕੀਤੀ, ਤਾਂ ਉਹ ਇਸ ਵਿੱਚ ਸਫਲ ਨਹੀਂ ਹੋ ਸਕਿਆ। ਪੈਸੇ ਕਢਵਾਉਣ ਲਈ, ਉਸਨੂੰ 24 ਲੱਖ ਰੁਪਏ ਦਾ ਹੋਰ ਟੈਕਸ ਜਮ੍ਹਾ ਕਰਵਾਉਣ ਲਈ ਕਿਹਾ ਗਿਆ।
ਸ਼ਿਕਾਇਤਕਰਤਾ ਸੰਜੀਵ ਪਾਂਧੀ ਦੇ ਅਨੁਸਾਰ, ਜਦੋਂ ਉਹ 24 ਲੱਖ ਰੁਪਏ ਟੈਕਸ ਜਮ੍ਹਾ ਕਰਨ ਤੋਂ ਬਾਅਦ ਪੈਸੇ ਕਢਵਾਉਣਾ ਚਾਹੁੰਦਾ ਸੀ, ਤਾਂ ਉਸਨੂੰ ਦੱਸਿਆ ਗਿਆ ਕਿ 1 ਕਰੋੜ ਤੋਂ ਵੱਧ ਪੈਸੇ ਹੋਣ ਕਾਰਨ ਖਾਤਾ ਫ੍ਰੀਜ਼ ਕਰ ਦਿੱਤਾ ਗਿਆ ਹੈ। ਜਿਸ ਲਈ ਹੁਣ 80 ਲੱਖ ਰੁਪਏ ਹੋਰ ਜਮ੍ਹਾ ਕਰਵਾਉਣੇ ਪੈਣਗੇ। ਆਪਣੀ ਪਹਿਲੀ ਰਕਮ ਬਚਾਉਣ ਦੇ ਇਰਾਦੇ ਨਾਲ, ਉਸਨੇ ਸਾਈਬਰ ਧੋਖਾਧੜੀ ਕਰਨ ਵਾਲਿਆਂ ਦੀ ਸਲਾਹ ‘ਤੇ ਹੋਰ ਪੈਸੇ ਜਮ੍ਹਾ ਕਰਵਾਏ। ਇਸ ਤਰ੍ਹਾਂ, 10 ਫਰਵਰੀ 2025 ਤੱਕ, ਉਸਨੇ ਕੁੱਲ 3 ਕਰੋੜ 72 ਲੱਖ 84 ਹਜ਼ਾਰ 999 ਰੁਪਏ ਵੱਖ-ਵੱਖ ਖਾਤਿਆਂ ਵਿੱਚ ਟ੍ਰਾਂਸਫਰ ਕਰ ਦਿੱਤੇ ਸਨ। ਬਾਅਦ ਵਿੱਚ ਉਸਨੂੰ ਅਹਿਸਾਸ ਹੋਇਆ ਕਿ ਉਹ ਧੋਖਾਧੜੀ ਦਾ ਸ਼ਿਕਾਰ ਹੋ ਗਿਆ ਹੈ। ਉਸਨੇ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ। ਇਸ ਸਾਲ ਇਸ ਮਾਮਲੇ ਦੀ ਪਹਿਲੀ ਐਫਆਈਆਰ ਸਾਈਬਰ ਪੁਲਿਸ ਸਟੇਸ਼ਨ ਵਿੱਚ ਦਰਜ ਕੀਤੀ ਗਈ ਸੀ। ਸਾਈਬਰ ਪੁਲਿਸ ਸਟੇਸ਼ਨ ਇੰਚਾਰਜ ਨੇ ਕਿਹਾ ਕਿ ਬਾਕੀ ਦੋਸ਼ੀ ਵੀ ਜਲਦੀ ਹੀ ਪੁਲਿਸ ਹਿਰਾਸਤ ਵਿੱਚ ਹੋਣਗੇ।
