ਕੋਲਕਾਤਾ: ਕਾਠਮੰਡੂ ਤੋਂ ਇਸਤਾਂਬੁਲ ਜਾ ਰਹੇ ਤੁਰਕਿਸ਼ ਏਅਰਲਾਈਨਜ਼ ਦੇ ਇਕ ਵੱਡੇ ਜਹਾਜ਼ (ਵਾਈਡਬਾਡੀ ਏਅਰਕ੍ਰਾਫਟ) ਨੂੰ ਬੁੱਧਵਾਰ ਦੁਪਹਿਰ ਤਕਨੀਕੀ ਖ਼ਰਾਬੀ ਕਾਰਨ ਅਚਾਨਕ ਕੋਲਕਾਤਾ ਵੱਲ ਮੋੜਨਾ ਪਿਆ।
ਜਹਾਜ਼ ਨੇ ਨੇਪਾਲ ਦੇ ਤ੍ਰਿਭੁਵਨ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਉਡਾਣ ਭਰੀ ਹੀ ਸੀ ਕਿ ਉਸ ਦੇ ਇਕ ਇੰਜਣ ਵਿਚ ਗੰਭੀਰ ਖ਼ਰਾਬੀ ਦਾ ਪਤਾ ਲੱਗਾ। ਪਾਇਲਟਾਂ ਦੀ ਸੂਝ-ਬੂਝ ਅਤੇ ਮੁਸਤੈਦੀ ਸਦਕਾ ਜਹਾਜ਼ ਵਿਚ ਸਵਾਰ ਸਾਰੇ 236 ਯਾਤਰੀਆਂ ਤੇ 11 ਕਰੂ ਮੈਂਬਰਾਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ ਹੈ।
ਏਅਰਪੋਰਟ ਸੂਤਰਾਂ ਅਨੁਸਾਰ, ਤੁਰਕਿਸ਼ ਏਅਰਲਾਈਨਜ਼ ਦੀ ਫਲਾਈਟ ਨੰਬਰ THY-727 ਨੇ ਦੁਪਹਿਰ 1:29 ਵਜੇ ਕਾਠਮੰਡੂ ਤੋਂ ਟੇਕ-ਆਫ ਕੀਤਾ ਸੀ। ਅਸਮਾਨ ‘ਚ ਉਡਾਣ ਦੌਰਾਨ ਹੀ ਪਾਇਲਟਾਂ ਨੂੰ ਜਹਾਜ਼ ਦੇ ਦੋ ਵਿੱਚੋਂ ਇਕ ਇੰਜਣ ਦੇ ਕੰਮ ਕਰਨਾ ਬੰਦ ਕਰਨ ਦਾ ਸੰਕੇਤ ਮਿਲਿਆ।
ਸਥਿਤੀ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਪਾਇਲਟਾਂ ਨੇ ਤੁਰੰਤ ਕਾਠਮੰਡੂ ਏਟੀਸੀ (ATC) ਨੂੰ ਸੂਚਿਤ ਕੀਤਾ ਅਤੇ ਸਥਿਤੀ ਦਾ ਜਾਇਜ਼ਾ ਲੈਣ ਲਈ ਧਾਡਿੰਗ ਜ਼ਿਲ੍ਹੇ ਦੇ ਧਰਕੇ ਖੇਤਰ ਦੇ ਉੱਪਰ ਜਹਾਜ਼ ਨੂੰ ਕੁਝ ਸਮੇਂ ਲਈ ਹੋਲਡ ‘ਤੇ ਰੱਖਿਆ।
ਜੋਖ਼ਮ ਟਾਲਣ ਲਈ ਕੋਲਕਾਤਾ ਦੀ ਚੋਣ
ਜਾਂਚ ਤੋਂ ਬਾਅਦ ਚਾਲਕ ਦਲ ਨੇ ਨਤੀਜਾ ਕੱਢਿਆ ਕਿ ਇੱਕ ਇੰਜਣ ਦੇ ਸਹਾਰੇ ਲੰਬੀ ਦੂਰੀ ਦੀ ਅੰਤਰਰਾਸ਼ਟਰੀ ਉਡਾਣ ਜਾਰੀ ਰੱਖਣਾ ਸੁਰੱਖਿਅਤ ਨਹੀਂ ਹੈ। ਹਾਲਾਂਕਿ ਜਹਾਜ਼ ਕੋਲ ਕਾਠਮੰਡੂ ਵਾਪਸ ਜਾਣ ਜਾਂ ਭੈਰਹਵਾ ਹਵਾਈ ਅੱਡੇ ‘ਤੇ ਉਤਰਨ ਦਾ ਵਿਕਲਪ ਸੀ, ਪਰ ਸੁਰੱਖਿਆ ਮਿਆਰਾਂ ਨੂੰ ਪਹਿਲ ਦਿੰਦੇ ਹੋਏ ਚਾਲਕ ਦਲ ਨੇ ਕੋਈ ਜੋਖ਼ਮ ਨਾ ਲੈਣ ਦਾ ਫੈਸਲਾ ਕੀਤਾ ਅਤੇ ਜਹਾਜ਼ ਦਾ ਰੁਖ ਭਾਰਤ ਦੇ ਕੋਲਕਾਤਾ ਵੱਲ ਮੋੜ ਦਿੱਤਾ।
ਕੋਲਕਾਤਾ ‘ਚ ਸੁਰੱਖਿਅਤ ਲੈਂਡਿੰਗ
ਕੋਲਕਾਤਾ ਸਥਿਤ ਨੇਤਾਜੀ ਸੁਭਾਸ਼ ਚੰਦਰ ਬੋਸ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਐਮਰਜੈਂਸੀ ਪ੍ਰੋਟੋਕਾਲ ਤਹਿਤ ਜਹਾਜ਼ ਦੁਪਹਿਰ 3:03 ਵਜੇ ਹਵਾਈ ਅੱਡੇ ‘ਤੇ ਸੁਰੱਖਿਅਤ ਲੈਂਡ ਕਰ ਗਿਆ। ਉਤਰਨ ਤੋਂ ਬਾਅਦ ਜਹਾਜ਼ ਦੀ ਡੂੰਘਾਈ ਨਾਲ ਤਕਨੀਕੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਯਾਤਰੀਆਂ ਲਈ ਬਦਲਵੇਂ ਪ੍ਰਬੰਧਾਂ ‘ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ। ਜਹਾਜ਼ ਵਿੱਚ ਸਵਾਰ ਸਾਰੇ 247 ਲੋਕ (236 ਯਾਤਰੀ ਅਤੇ 11 ਕਰੂ ਮੈਂਬਰ) ਪੂਰੀ ਤਰ੍ਹਾਂ ਸੁਰੱਖਿਅਤ ਹਨ।
